УИХ-ын чуулганы /2025.07.02/-ны өдрийн хуралдаанаар Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэх асуудлыг хэлэлцэв.

Уг асуудалтай холбоотойгоор гишүүд асуулт асууж, хариулт авсан болно.

С.Эрдэнэбат гишүүний асуултад, УИХ-ын гишүүн, Монгол Улсын сайд, ЗГХЭГ-ын дарга С.Бямбацогт дараах хариултыг өгөв.

Газартай холбоотой асуудал Ерөнхий сайдын харьяа агентлаг болсон. Газрын асуудал өөрөө байгаль орчин хамгаалах, уул уурхай олборлох, барилга байшин, зам харгуй, эрчим хүч барих гээд олон асуудлуудын зангилаа байдаг учраас Ерөнхий сайдын харьяанд ирсэн юм байна лээ. Газар олгох, эзэмшүүлэх, ашиглуулах, өмчлүүлэх асуудал дээр Засгийн газрын хуралдаанаас шийдвэр гардаг болсон нь иргэдийн хувьд нэлээн хүндрэл учирдаг болсон байгаа. Үүнийг ойрын хугацаанд засаж залруулж, аймаг, нийслэл, сум, дүүргийн Засаг дарга нарт газар эзэмшүүлэх ашиглуулах эрхийг нь олгох. Иргэдэд хүнд сурталгүй, хурдан шуурхай үүсэх тал дээр  Засгийн газар ойрын үед шийдвэр гаргана.