http 230
Улсын бүртгэлийн байгууллагын программ зохиогч, инженерүүдийн нэгдсэн сургалт болж байна
2021.08.20
Боловсрол, Соёл, Шинжлэх Ухаан, Урлаг

Улсын бүртгэлийн байгууллагын программ зохиогч, инженерүүдийн нэгдсэн сургалт болж байна

Улсын бүртгэлийн ерөнхий газрын сургалтын төлөвлөгөөний дагуу бүртгэлийн үйл ажиллагаанд ашиглагдах программ хангамжийн хөгжүүлэлтийг танилцуулах, системд шинээр нэмэгдсэн өгөгдөл, түүнийг удирдах, ажиллуулах зэрэгт мэдлэг мэдээлэл, дадлага олгох ээлжит сургалтыг Азийн хөгжлийн банкны Техникийн туслалцааны дэмжлэгтэйгээр хэрэгжиж буй ТА9372-МОН: Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төслийн хүрээнд УБЕГ-ын Мэдээллийн технологийн газар, аймаг, нийслэл дэх Улсын бүртгэлийн газар, хэлтсийн программ зохиогч, инженерүүдийг хамруулан зохион байгуулж байна.

Энэхүү сургалтыг УБЕГ-ын дарга Д.Дэлгэрсайхан нээж хэлсэн үгэндээ “Бүртгэлийн үйлчилгээг иргэдэд ойртуулах, түргэн шуурхай, цаг алдалгүй, оочер дараалалгүй хүргэхийн тулд боловсон хүчний нөөц бололцоо ихээхэн шаардлагатай байдаг. Уг асуудлыг бид техник технологийн хүчээр шийдвэрлэхийг зорьж байгаа бөгөөд үүнд мэдээллийн технологийн ажилтан та бүхний мэдлэг чадвар, хичээл зүтгэл чухал үүрэг гүйцэтгэх юм” хэмээгээд сургалтад хамрагдаж буй албан хаагчдад амжилт хүслээ.

Сургалтаар УБЕГ-ын Мэдээллийн технологийн газрын холбогдох хүмүүс илтгэл тавьж мэдээлэл хүргэхээс гадна Харилцаа холбоо, Мэдээллийн технологийн газрын Цахим хөгжлийн газрын дарга Л.Энхбат, “Үндэсний дата төв” УТҮГ-ын Систем нэгтгэлийн хэлтсийн дарга Ө.Гантулга, Мэдээллийн технологийн хөгжүүлэлтийн хэлтсийн ахлах мэргэжилтэн Н.Баттөр, “TomYo Edtech”-ийн үүсгэн байгуулагч В.Баярсайхан, “Интерактив” ХХК-ийн менежер Э.Ундрал, Б.Урангэрэл нар тус тус холбогдох сэдвийн хүрээнд илтгэл тавьлаа.   

Ташрамд дурдахад, Иргэний, эд хөрөнгийн эрхийн, хуулийн этгээдийн улсын бүртгэл болон Улсын бүртгэлийн нэгдсэн архивын үйл ажиллагаанд үндсэн 4 төрлийн системүүд ашиглагддаг бөгөөд дагалдах 42 төрлийн программ хангамжийг бүртгэлийн үйл ажиллагаанд ашиглаж байна. Улсын бүртгэлийн ерөнхий газрын зүгээс программ хангамж болон техник хангамжийн шинэчлэл, сайжруулалтын ажлыг байнга хийдэг байна.

“Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл”-ийн хүрээнд бүртгэлийн мэдээллийн технологийн тоног төхөөрөмжийн шинэчлэл, анхан шатны нэгжүүдийн тоног төхөөрөмжийг бүрэн шинэчлэх зэрэг ажлууд хийгдэж байна. Мөн нийслэлийн дүүрэг, аймаг, сумдын улсын бүртгэлийн нэгжийг нэгдсэн сүлжээнд холбосон бөгөөд тус дэд бүтцийг ашиглан бүртгэлийн үйлчилгээг түргэн шуурхай, харьяалал харгалзахгүй үзүүлэх боломжийг бүрдүүлсэн юм.

Цахим иргэний үнэмлэхний бичилтийн үйлдвэрийг тус газрын Мэдээллийн технологийн газар хариуцан ажилладаг бөгөөд цахим үнэмлэхийн мэдээллийг татаж, иргэний цахим үнэмлэх дээр хувь хүний мэдээллийг хэвлэн хүргүүлэх үйл ажиллагааг хийж байна.  

ШИНЭ МЭДЭЭ