Нутгийн өөрөө удирдах байгууллагын 30 жилийн ой энэ онд тохиож байна. Энэ хүрээнд Баянзүрх дүүргийн Иргэдийн Төлөөлөгчдийн Хурлын Ажлын албанаас ахмадуудаа хүлээн авч хүндэтгэл үзүүллээ.

Баянзүрх дүүргийн Иргэдийн Төлөөлөгчдийн Хурлын дарга А.Баяр, Баянзүрх дүүргийн Иргэдийн Төлөөлөгчдийн Хурлын Нарийн бичгийн дарга бөгөөд Ажлын албаны дарга Ч.Мэндсайхан нар ахмадууддаа мэндчилгээ дэвшүүлж, Баянзүрх дүүргийн хөгжлийн бодлогын бичиг баримт болох “Хөгжлийн зураглал 2030” номын дээжийг өргөн барилаа.

Баянзүрх дүүргийн Засаг даргын Тамгын газар болон Баянзүрх дүүргийн Иргэдийн Төлөөлөгчдийн Хурлын Ажлын албанд нийтдээ 27 жил ажилласан С.Доржсумъяа гуай энэ үеэр “”Хөгжлийн зураглал 2030” номыг бүтээсэн нь одоо дүүрэг удирдаж байгаа залуусын хийсэн хамгийн ухаалаг үйлдэл гэж харж байна. Энэ ном төсвийн мөнгийг үр ашиггүй үрэх биш шат дараатай арга хэмжээнүүдэд зарцуулан ажиллах, цаашид авч хэрэгжүүлэх үйл ажиллагааны чиглүүлэгч болно гэж харж байна” хэмээн хэллээ.

Мөн энэ жилээс эхлэн Баянзүрх дүүргийн Иргэдийн Төлөөлөгчдийн Хурлын Ажлын албанаас санаачлан үе үед ажиллаж байгаад тэтгэвэртээ гарсан ахмад ажилтнууддаа “Өндөр настан” үнэмлэхийг гардуулж байна. Ингэснээр баяр ёслол болон шаардлагатай үед үнэмлэхээ үзүүлээд хэрэгцээт үйлчилгээгээ авах боломж бүрдэх аж.