Жил гаруйн өмнө нэгэн бүсгүй өөрийн нүүр номын хуудсандаа хөгжлийн бэрхшээлтэй хүүгээс хөдөөнөөс үүрч дүүрэн ирж, эмчилгээнд хамруулдаг, айл айлын хаяа бараадаж хоног төрүүлсээр буцдаг. Эргээд л хэдэн сарын дараа дахиад л ирж, нөгөөх л айлаа зутрааж, өөрсдийгөө ч зутрааж байгаа талаараа бичсэн байсан билээ.

Хүүгээ тасралтгүй эмчилгээнд хамруулахын тулд энэ ээж үүрч дүүрээд ч болтугай эмнэлэгт очдог, хаа таарсан газраа хуурайлж, хөхүүлчихээд замын унаанд дайгдан нутаг буцдаг тухайгаа бичсэн сэтгэгдлийнх нь дор олон хүн хэрхэн яаж туслах, унааны мөнгө өгөх үү, эмчилгээнд нь мөнгө хандивлах уу хэмээн бичсэн байж билээ. Харин тэрхүү сэтгэгдэл хэсэгт УИХ-ын гишүүн Ц.Цогзолмаа “надтай холбогдоорой” хэмээн утсаа үлдээсэн байсан аж.

С.Шүрэнцэцэг гэх бүсгүй бичсэн сэтгэгдлийнх нь дагуу түүнтэй холбогдоход орон байрны дэмжлэг үзүүлэхээр хөөцөлдөж өгөхөө амлаж, улмаар ээж хүү хоёрыг нийслэлд ирээд орох оронтой болгожээ. Хөдөө орон нутгаас ирж, айлын хаяа бараадаж байсан ээж, хүү хоёр нийслэлд байртай болсноор эмчилгээндээ тасралтгүй хамрагдаж, хүү нь өдгөө “ээжээ онгой” гэх мэтээр ойр зуурын үг хэлдэг болсон баярт мэдээгээ тэрбээр мөн л нүүр номондоо оруулсан байсан юм.

Эмчилгээг таслахгүй хийснээр хүү нь хэлд орж, мөн шөрмөсний хөгжил нь сайжирна гэж эмч нь зөвлөжээ. С.Шүрэнцэцэг бүсгүй УИХ-ын гишүүн Ц.Цогзолмаа өөрийнхөө гэрт ирэхийг урьсан бөгөөд Ц.Цогзолмаа гишүүн ч нэг өдөр уулзаж, танилцахаа амлав. Бяцхан хүүгийн төлөө хийсэн энэ том үйл хэрэгт тань уншигчдынхаа өмнөөс талархаж байна.