Засгийн газрын өнөөдрийн ээлжит хуралдаанаар Чингис хааны музей байгуулах, Байгалийн түүхийн музейг Үлэг гүрвэлийн музейтэй нэгтгэх тогтоол баталжээ. Энэ талаар БСШУС-ын сайд Ё.Баатарбилэг мэдээлэв.

Тэрбээр, “Байгалийн түүхийн музейн барилга ашиглалтын хугацаа дуусч, нурахад бэлэн болсон. Үүний улмаас 12 мянган үзмэрийг агуулахад хадгалж байгаа. Тиймээс Уг музейн шинэ барилга ашиглалтад орох хүртэл өнөөгийн Үлэг гүрвэлийн музейн байранд үзмэрийг нээх юм. Байгалийн түүхийн музейн хуучин барилгыг буулгаж, Чингис хааны музейг байгуулах бөгөөд өнөөдөр Засгийн газрын хуралдаанаар зураг төслийг нь танилцууллаа.

Уг музей Чингис хаантай холбоотой бүхий л судалгаа, шинжилгээ, эрдэм шинжилгээ болон аялал жуулчлалын төв байх юм. Энэ бол хүүхэд, залууст эх түүхээ танин мэдэх, олон нийтэд түгээн дэлгэрүүлэх, түүгээр бахархах үзлийг төлөвшүүлэх, олон нийтийг соён гэгээрүүлэх түүхэн шийдвэр юм” гэлээ.