УИХ-ын өнөөдрийн /2019.04.12/ нэгдсэн чуулганы үдээс хойших хуралдааны эхэнд Улсын Их Хурлын гишүүн Х.Болорчулуунаас Монгол Улсын Ерөнхий сайдад хандан “Төрөөс дээд боловсролын салбарт баримтлах бодлогын талаар” тавьсан асуулгын хариуг сонслоо. Асуулгын хариуг УИХ-ын гишүүн, БСШУС-ын сайд Ё.Баатарбилэг танилцууллаа. Асуулгын хариутай холбогдуулан УИХ-ын гишүүд асуулт асууж, санал хэллээ.

Энэ үеэр УИХ-ын гишүүн Б.Бат-Эрдэнэ гишүүн Монгол хүнийг багаас нь Монгол хүн болгож төлөвшүүлэх асуудлыг хөндсөн юм. Тэрээр 

Ё.Баатарбилэг сайд хэд хэдэн чухал шийдвэр гаргаад, хэрэгжүүлэх гэж ажиллаж байгаад баяртай байгаа. Монгол уламжлалт боловсролын ухаан бол юу юугүй уралдуулаад байх биш, харин оролцоог нь хангахыг чухалчилдаг. Гэтэл цэцэрлэгийн наснаас нь уралдуулдаг буруу жишиг тогтоосон.  Үүнийг өөрчлөхөөс эхлээд олон чухал арга хэмжээнүүдийг авч хэрэгжүүлж байна гэж ойлгож байна. Би бол энэ салбарт ажиллаж байгаа багш хүнийг хувьд хоёр зарчмыг баримталдаг. Нэг нь бол суралцагчдын нөөц боломжийг нээх, хөгжүүлэх, нөгөө нь хүний эрхэм ёс, үнэт зүйлийг хэрхэн суулгах вэ гэдгийг л баримталдаг. 

Би 20 жилийн өмнө жижиг сургууль үүсгэн байгуулсан. Энэ сургуулиас Олимпын анхны аварга төрүүлсэн. Тэгэхээрээ бид төгсөгчдөө харахад зөвхөн алдартай тамирчин бэлдэхгүй, тэд нийгэмд байр сууриа эзэлсэн хүмүүс болсон байна. Анх байгуулахаасаа л би мэндлэхээс эхлээд зааж, төлөвшүүлсэн. Гэтэл өнөөдөр ЕБС-ийн багш нар чинь өөрсдөө хүнтэй олигтой мэндлэхгүй юм байна шүү дээ.

БСШУС-ын сайд Ё.Баатарбилэг түүний байр суурьтай санал нэг байгаагаа хэлээд энэ жилээс бага ангийн сурагчдын хөтөлбөрт өөрчлөлт оруулж, энэ чиглэлээр дорвитой ажил хийнэ гэдгээ хэллээ. 

Б.Бат-Эрдэнэ гишүүнтэй санал нэг байна. Монголын хувийн хэвшлийн ЕБС, СӨБ-ын байгууллагууд, Их дээд сургуульд тодорхой хэмжээний ачааг үүрч, нийгэмд үүрэг гүйцэтгэж ирсэн. Маш сайн сургалттай, төгсөгчдөөс нь улс орон, нийгэмд тэргүүлэх зэргийн мэргэжилтнүүд болчихсон олон сургууль байгаа. Үүнийг нэг жишээ бол Б.Бат-Эрдэнэ гишүүний хэлсэн Аварга дээд сургууль юм. 

Хүн болгох, Монгол хүн болгож төлөвшүүлэх, Монгол өв соёлыг багаас эзэмшүүлэхэд цэцэрлэгийн нас, ялангуяа бага ангийн хөтөлбөрт нь илүү түлхүү суулгаж өгөх ёстой юм байна гэж үзэж байна. Бага ангийн хүүхдүүдийг хооронд нь уралдуулахаас илүү багаар нь ажиллуулах, багийн тэмцээнийг хөгжүүлэх ёстой юм байна гэдэг дээр манай Боловсролын хүрээлэнгийн эрдэмтэд хэлж байгаа. Тэгэхээр бид уншуулж, бичүүлж, бодуулж сурахаас илүү хүн болгоход анхаарах ёстой гэж харж. Энэ жилээс сургалт, агуулгад нилээд өөрчлөлт оруулахаар ажиллаж байгаа. Ялангуяа бага ангийн хүүхдийн хөтөлбөрт анхаарч өөрчлөлт оруулна.