УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Ж.Чинбүрэн:

Намрын чуулганаар Эмийн түр хороог ахалж нээлттэй сонсгол хийсэн. Ажиллах явцад нэгдмэл ашиг сонирхолтой этгээд гэдэг хуулийн заалтад холбогдсон 260 гаруй хүний нэрийг шийдвэр гаргах түвшинд нөлөөлж оролцсон эсэхийг шалгуулахаар АТГ-т өгсөн. Энэ ажил ямар түвшинд явж буйг асууя.

Дээрх 260 хүний нэрсийг хуулийн заалттай нь уялдуулж харахад ямар нэгэн хамааралгүй олон хүн байна. АТГ-т өгсөн 1 шалтгаан нь хамааралгүй хүмүүсийг нь цагаатгах зорилготой. Нэгдмэл ашиг сонирхолтой гэдэг хуулийн заалт нь маш өргөн утгатай. Харин шийдвэр гаргах түвшинд нөлөөтэй оролцсон уу гэдгийг тодруулах нь чухал. Эмийн түр хороо ажиллаж 10 гаруй шийдвэрлэх асуудлыг ЗГ-т хүлээлгэн өгсөн. НББХ-ны хурлаар тайлангаа тавихыг шаардлаа. Энэ үйл явцын талаар мэдээлэл өгөөч.

Түүний асуултад АТГ-ын дарга З.Дашдаваа хариуллаа.