2022.06.30

Т.Энхтүвшин: "H3" 3 улсыг холбосон хурдны хатуу хучилттай замаа хурдан барьж дуусгах хэрэгтэй

УИХ-ын чуулганы /2022.06.30/-ны өдрийн хуралдаанаар “Олон улсын автотээвэрлэлт гүйцэтгэх тээврийн хэрэгслийн багийн ажлын тухай Европын хэлэлцээр”-ийг соёрхон батлах тухай хуулийн төсөлтэй хамт өргөн мэдүүлсэн Замын хөдөлгөөний аюулгүй байдлын тухай хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг хэлэлцлээ.

Хуулийн төсөлтэй холбогдуулан УИХ-ын гишүүд асуулт асууж, санал хэллээ.

УИХ-ын гишүүн Т.Энхтүвшин: 

H3 гэж 3 улсыг холбосон хурдны хатуу хучилттай зам хэзээ баригдаж дуусах вэ. Энэ зам баригдаж дууссанаар Монголын экспорт, импорт транзит ачаааны гаралт нэмэгдэнэ. Ингэснээр манай улс нилээн ашиг олох боломж, бололцоотой. Хоёрдугаарт, Замын-Үүдийн асуудалд анхаараач ээ. Энд байгаа хоосон чингэлэгүүдийг яах юм бэ? Гуравдугаарт, Монгол улсын Ерөнхий сайд чингэлэг тээврийг хэвийн болгох тал дээр захирамж гаргаад 6,6 тэрбум төгрөгийн асуудлыг шийдсэн. Үүний дагуу Авто тээврийн үндэсний газрын 10 хүн, Монголын Төмөр замын 2, ХХЕГ-ын 27 хүн, Зэвсэгт хүчний 57 хүн, ЦЕГ-ын 10 хүн гээд маш олон хүн Замын-Үүдэд очиж ажилласан. Байрласан буудал, хоолны мөнгөө төлөөч ээ. Замын үүд та нарын идэж уусан 1,3 тэрбум төгрөгийг төлж чадахгүй. Та нар ажил зохион байгуулсан бол чингэлэг, тээвэр эхлээд явж байгаа бол  тэр мөнгөө төлөх хэрэгтэй. Өмнөөс чинь ичиж байна.

Түүний асуултад ажлын хэсгийн гишүүд хариуллаа.