УИХ-ын чуулганы өнөөдрийн \2020.07.08\  нэгдсэн хуралдаан эхэллээ. Хуралдаанаар Монгол Улсын Засгийн газрын бүрэлдэхүүн, сайд томилох асуудлыг  хэлэлцэж байна.

Хэлэлцэж буй асуудалтай холбогдуулан УИХ-ын гишүүд үг хэлж, асуулт асууж байна.

УИХ-ын гишүүн Б.Пүрэвдорж:

“Сайд нар дунд хамгийн асуудалтай нь ХЗДХ-ийн сайд Х.Нямбаатар байна. Эрүүгийн хуульд хөөн хэлэлцэх хугацааг байхгүй болгосонтой холбоотойгоор 1500 гэмт хэрэгтэн та бидний дунд чөлөөтэй явж байна. Хугацааг зассан гэж байгаа ч үүний дагуу ял авч шийтгүүлсэн хүн нэг ч байхгүй. Энэ бол сонгуулийн өмнөх төөрөгдүүлэлт байсан.

Монголын ард түмэн 2017.7.1-ээс хэрэгжиж эхэлсэн зөрчлийн хуулиар 1,5 сая иргэн 500 гаруй тэрбум төгрөгөөр торгуулсан. Монголын хүн бүрт хуваахад өлгийтэй ихүүхэд хүртэл 150,000 төгрөгөөр торгуулсан. Нэг талдаа торгуулчихоод нөгөө талдаа МАН-аас мөнгийг нь авч сонголтоо хийсэн байна. Энэ хуулийг зөөллөөрэй. Хэтэрхий хатуу хууль шүү.

ХХААХҮ-ийн сайдад хэлье. Махны экспорт маш их нэмэгдсэн. Үүний үр дүнд 150,000 төгрөгийн үнэтэй эр хонь 250,000 төгрөг болж өссөн. Гэтэл Ч.Улаан сайд махны экспортыг 12 компанид өгч энэ байдлыг алдагдуулсан.”