УИХ-ын Хууль зүйн байнгын хорооны /2025.04.02/-ны өдрийн хуралдаанаар Авлигатай тэмцэх газрын даргаар З.Дашдавааг улираан томилуулах тухай Ерөнхий сайдын саналыг хэлэлцлээ.
Авлигын эсрэг хуульд зааснаар АТГ-ын даргыг Ерөнхий сайд санал болгож, УИХ томилохоор заасан юм. Иймээс Ерөнхий сайд бүрэн эрхийнхээ хүрээнд АТГ-ын одоогийн удирдлагыг дахин 6 жил ажиллуулахаар санал дэвшүүлээд байна. УИХ дахь МАН-ын бүлэг, УИХ дахь Ардчилсан намын бүлэг дээрх саналыг хэлэлцээд олонхиороо дэмжээд байгаа.
Санал хураалт явуулахад АТГ-ын даргаар З.Давдавааг АТГ-ын даргаар улираан томилохыг гишүүдийн 72.2 хувь нь дэмжлээ.
Хэлэлцэж буй асуудалтай холбоотой асуудлаар гишүүд санал бодлоо илэрхийлсэн.
УИХ-ын гишүүн Б.Энхбаяр:
Авлигатай тэмцэх бол ганц АТГ-ын ажил биш. 90 хувь нь улстөрчид, Засгийн газрын манлайллаас шалтгаална. Төрийн өмчийн компаниудад гол авлигын асуудал байгаа. Үүнийг хянахад бэрх болж байгаа гэж З.Дашдаваа дарга хэлж байна.
Бүтээмжийн менежер гэдгийн талаар П.Сайнзориг, З.Мэндсайхан бид гурав Ерөнхий сайдад асуулга тавьсан байгаа. Төрийн өмчийн 123 компанид 400 гаруй бүтээмжийн менежер гэсэн орлогч даргын статустай, 5-6 саяын цалинтай, машин унадаг, сар тутам 30, жилдээ 30 тэрбумын цалин авдаг албан тушаалтнууд томилж байгаа юм байна. Энэ бол улс төрийн авлига. Намуудыг дуугүй болгох гэж байгаа юм. Найран дундаа идэж, уух гэж байна гэсэн үг. Энэ хүмүүстээ АТГ хуулийн хүрээндээ хяналтаа сайн тавиарай.
Миний санаж байгаагаар гурван жилийн өмнө АТГ төрийн өмчийн компаниуд дээр 10 их наядын авлигын асуудал байгааг олон нийтэд мэдээлсэн. Энэ нь ч үнэн гэдэг нь өнгөрсөн хугацаанд болсон үйл явдлуудаар нотлогдсон. Төрийн өмчийн нэг компанийн захирлын сейфээс 7.5 тэрбум төгрөг бэлнээр хураагдаж байсан. Үүн дээр Засгийн газар өөрөө манлайлж ажиллах хэрэгтэй. АТГ илрүүлээд шийтгээд байдаг. Гэтэл 7.5 тэрбум төгрөг сейфтээ хийж байгаад баригдсан Батдөл гэж нөхөр ШШГЕГ-ын харьяа Богд уулын амралтын газар ялаа эдэлж байгаа юм билээ. Засгийн газар яагаад байгаа юм бэ. Үүнийг амралтын газар амрааж байгаа сайд байна гэсэн үг. Өөрийг нь илчлээгүйн төлөө Богд ууланд амрааж байна гэсэн үг. Тиймээс эзнийг нь олж хариуцлага тооцоорой"
