"Нутгийн хөгжилд эрдэмтдийн оролцоо" анхдугаар чуулган болно

2025.04.02

"Нутгийн хөгжилд эрдэмтдийн оролцоо" анхдугаар чуулган болно

Дундговь аймгаас төрсөн эрдэмтдийн "НУТГИЙН ХӨГЖИЛД ЭРДЭМТДИЙН ОРОЛЦОО" анхдугаар уулзалт, зөвлөгөөн 2025 оны 04 дүгээр сарын 04 өдөр Төрийн ордонд болох гэж байна.

Анх удаа зохион байгуулж буй тус үйл ажиллагааны зорилго нь Дундговь аймгаас төрсөн эрдэмтдийг нэгтгэн тэдгээрийн эрдэм шинжилгээ, судалгааны ажлыг орон нутгийн онцлог, уур амьсгал, газар нутаг, хүн ардын эрүүл мэнд, сурч хөгжих боломжид чиглүүлэн үр дүнг орон нутгийн удирдлагуудтай хамтран шинжлэх ухааны үндэслэлтэй хэрэгжүүлэх, бодит хөрсөнд буулган төрсөн нутгаа хөгжүүлэхэд оршино.

Энэхүү чуулганы МОДЕРАТОРУУД:

- ТАЛЫН ГЭГЭЭ ЭРДЭМТЭД" ТББ-ын ТУЗ-ын дарга, Шинжлэх Ухааны Академийн Хэл зохиолын хүрээлэнгийн Утга зохиол судлалын салбарын эрдэм шинжилгээний тэргүүлэх ажилтан, доктор (Ph.D), дэд профессор ДОРЖСҮРЭНГИЙН БОЛОРМАА

- ТАЛЫН ГЭГЭЭ ЭРДЭМТЭД" ТББ-ын гүйцэтгэх захирал, МУБИС-ийн Дүрслэх урлаг, технологийн сургуулийн захирал, доктор (Ph.D) СҮХБАЯРЫН БАТЦООЖ

- МУИС-ийн Хэл шинжлэлийн ухааны доктор (Ph.D), дэд профессор ОЮУНХАНДЫН ДЭМЧИГМАА

- МЗЭ-ийн орлогч дарга, хэл бичгийн ухааны доктор (Ph.D) ПЭРЭНЛЭЙН НЯМЛХАГВА нар ажиллах юм.

Харин Дундговь аймгийн эрдэмтдийн хамтран байгуулсан “Талын гэгээ эрдэмтэд" ТББ нь Дундговь аймгийн харьяат эрдэмтэн судлаачдыг нэгтгэх, тэдгээрийн эрдэм шинжилгээний бүтээл, судалгааны ажлыг судалгааны эргэлтэд оруулах, эрдэмтэн судлаачид хоорондоо хамтран ажиллаж орон нутгийн байгалийн онцлогт суурилсан аялал жуулчлал, ургамал, модны гарц тариалалтыг сайжруулах, говь нутгийн амьдралын хэв маяг, хүн ардын амьдрах орчин нөхцөл, усны хангамж, эрүүл мэнд гээд нэн шаардлагатай цаг үеийн асуудлуудыг шинжлэх ухааны үндэслэлтэй судлах, орон нутгийн удирдлагуудын хамт шийдвэрлэх арга замыг тодорхойлох зорилгоор байгуулагдсан юм.