Монгол Улсын Засгийн газрын 2004 оны 163 дугаар тогтоолын дагуу жил бүрийн 11 дүгээр сарын сүүлийн 7 хоногт “Шинжлэх ухааны ажилтны өдөр”-ийг уламжлал болгон зохион байгуулж ирсэн.

Энэхүү өдөртэй холбогдуулан, Шинжлэх ухааны Академич, УИХ-ын гишүүн Д.Рэгдэл мэндчилгээ дэвшүүллээ. Тэрбээр хэлэхдээ, “Монгол түмэндээ 23 дахь удаагаа тэмдэглэж буй “Шинжлэх ухааны ажилтны өдөр”-ийн мэнд хүргэе. Шинжлэх ухаан, технологийн хөгжил дэвшлийн төлөө мэдлэг оюун, туршлага, сэтгэл зүтгэлээ зориулан яваа эрхэм хүндэт эрдэмтэн судлаачид, шинжлэх ухааны салбарын нийт ажилтан, ажилчид, эрдэм ухааныг эрхэмлэн дээдлэгч нартаа талархаж байна. Иймд Монгол Улсын Их Хурлын нэрийн өмнөөс болон хувиасаа чин сэтгэлийн мэндчилгээ дэвшүүлж, эрүүл энх, аз жаргалтай, эрдэм номын аяндаа арвин их олз омогтой байхын ерөөлийг өргөе” хэмээв.

Ташрамд дурдахад, манай улсын шинжлэх ухааны салбарын санхүүжилтийн ДНБ-д эзлэх хувь хэмжээ дэлхийн дунджаас 20 дахин бага. Гэтэл НҮБ-аас хөгжиж буй орнууд ДНБ-ийхээ нэг хувиас дээш санхүүжүүлэлтийг шинжлэх ухаан, судалгаа хөгжүүлэлтийнхээ салбарт зарцуулж байж үр дүн нь эдийн засгийн хөгжилд бодит нөлөө үзүүлнэ гэж зөвлөдөг. Тиймээс 2028 он гэхэд салбарын санхүүжилтийг ДНБ-ий нэг хувьд хүргэхийг мөрийн хөтөлбөрт тусгасан гэдгийг Д.Рэгдэл гишүүн хэлж байгаа юм.