МОНГОЛ УЛСЫН ИХ ХУРЛЫН ГИШҮҮН

Сэлэнгэ аймгийн 30 сургууль биологийн кабинетийн иж бүрэн хэрэглэгдэхүүнтэй боллоо
2021.09.29
Боловсрол, Соёл, Шинжлэх Ухаан, Урлаг

Сэлэнгэ аймгийн 30 сургууль биологийн кабинетийн иж бүрэн хэрэглэгдэхүүнтэй боллоо

Сэлэнгэ аймаг боловсролынхоо салбарт тэр дундаа хүүхэд, багачуудынхаа сургалтын орчин нөхцөлийг сайжруулах чиглэлээр олон бүтээлч хөрөнгө оруулалтын ажлуудыг хийж байна. Тодруулбал 2020-2021 онд нэг тэрбум тавин сая төгрөгийн хөрөнгө оруулалтыг хийж, боловсролын салбараа дэмжин ажиллажээ.  

Тэгвэл өнөөдөр Сэлэнгэ аймгийн 30 сургууль биологийн кабинетийн иж бүрэн хэрэглэгдэхүүнтэй боллоо. Энэхүү ажлыг УИХ-ын гишүүн Ч.Ундрам санаачилж, анх “Чинбатын Ундрам” хөгжлийн сангаасаа Мандал сумын 4-р сургуульд биологийн иж бүрэн кабинетийг нээн тохижуулж өгч байсан юм. Тэрээр цаашид тойргийнхоо бүх сургуулийг ийнхүү тохижуулах зорилго тавьж, шаардлагатай хөрөнгийг улсын төсөвт суулгаж чадсанаар энэхүү ажил биеллээ олжээ.

Энэ үеэр Сэлэнгэ аймгийн Засаг дарга Ш.Оргил аймаг орон нутгийнхаа хөгжлийн ирээдүй болсон хүүхэд багачуудын сурч боловсрох их үйлсэд үнэтэй хөрөнгө оруулалт хийж байгаа эрхэм гишүүнд талархал илэрхийлж, аймгийнхаа бүх сургуулийг иж бүрэн технологийн кабинеттэй болгохоор зорьж байгаагаа дуулгалаа. Энэ кабинет хүүхдүүдийг амьдрах ухаан, амьдрах арга барилд сургах анхны дадлыг өгөхөд онцгой үүрэгтэй болохыг ч аймгийн дарга онцолсон.

Мөн энэ үеэр УИХ-ын гишүүн Ч.Ундрам:  “Сэлэнгэ аймгийн ЕБ-ын 30 сургуулийг Биологийн иж бүрэн лабораторитой болголоо. Биологийн сургалтын чанарыг дээшлүүлэхэд чиглэсэн энэхүү лабораторийг сургалтдаа ашигласнаар ирээдүйн эрүүл мэнд, хөдөө аж ахуй, эм зүй, био-технологи, био-инженерчлэл, ой судлал, байгаль хамгаалал, амьтан судлал, хүрээлэн буй орчин судлалын чиглэлийн мэргэжилтнүүдийг бэлтгэхэд чухал ач холбогдолтой болох юм. Бид ирээдүйн эрдэмтэн, мэргэд, дээд боловсролтой мэргэжилтнүүдээ одооноос бэлтгэх ёстой” хэмээн хэллээ.

Мөн багш нарын зүгээс эл лабораторийг биологийн хичээлээс гадна эрүүл мэнд, биеийн тамирын хичээлүүдэд ч мөн ашиглах боломжтой хэмээн ярьж байв. Хэрэглэгдэхүүн гардуулах үйл ажиллагаанд УИХ-ын гишүүн Ч.Ундрам, Сэлэнгэ аймгийн Засаг дарга Ш.Оргил, БГ-ын дарга Ч.Жаргалсайхан нар оролцлоо.

ШИНЭ МЭДЭЭ