УИХ-ын чуулганы /2025.04.04/-ний өдрийн хуралдаанаар Зөвшөөрлийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцлээ.

Хэлэлцэж буй асуудалтай хобогдуулан гишүүд асуулт асуулаа.

УИХ-ын гишүүн Б.Жаргалан:

Зөвшөөрлийн тухай хуулиар цахим мөрийтэй тоглоомын асуудлыг бүрмөсөн хориглож байгаа. Би байнгын хороон дээр байр сууриа илэрхийлсэн. Ер нь яагаад энэ цахим мөрийтэй тоглоом газар аваад байна. Яагаад залуучууд энэ төрлийн эрсдэлд ороод байна гэдгийг цогцоор нь харах ёстой. Энэ бол эргээд ажилгүйдэл, ядууралтай холбоотой асуудал. Тэгэхээр эдийн засгаа яаж тэлэх юм, ажлын байр яаж бий болгох вэ гэдэг асуудалд давхар анхаарал хандуулахгүй бол зүгээр аль нэгэн зүйлийг хорьж цагдах, баахан хүмүүсийг эрүүгийн хэргийн холбогдогчоор татах асуудал чинь эцсийн шийдэл биш шүү. .Зөвшөөрлийн тухай хуульд нэмэлт өөрчлөлт оруулж байгаатай холбогдуулаад, Банкны тухай хуульд нэг нэмэлт оруулахаар оруулаад ирсэн. Энэ бол ноцтой харагдаад байгаа юм.

Банкны тухай хуулийн 7.2-т банк түүний харилцагч болон гуравдагч этгээд нууц гэж үзсэн аливаа мэдээллийг доор дурдсанаас бусад тохиолдолд бусдад гаргаж өгөх задруулахыг ашиглахыг банкны хувьцаа эзэмшигч ТУЗ-ийн дарга, гишүүн, гүйцэтгэх удирдлага, хянан шалгах зөвлөл, ажилтанд хориглоно. гээд ийм заалт орчихсон байгаа. Энэ заалт хувь иргэний нууц мэдээллийг хамгаалахтай холбоотой заалт. Энэ төлбөр таавар, бооцоо, тоглоом, цахим мөрийтэй тоглоомын үйл ажиллагаа эрхлэх, зуучлах төлбөр таавар, бооцоо, тоглоом, мөрийтэй тоглоом сурталчлах, цахим хэрэгслийг ашигласан, залилах гэмт хэрэгт хуульд заасны дагуу мөрдөн шалгах байгууллагаас шаардсан буюу зөвхөн мөрдөгчийн хүсэлтээр хүний нууц мэдээллийг задруулах ийм нөхцөл байдлыг үүсгэчихсэн заалтыг нэмж байгаа юм. Тэгэхээр энэ бол яг энэ нөхцөлд шаардлагагүй гэж харж байна. Яагаадгэхлээр 7.2.3-д прокурор зөвшөөрсөн нөхцөлд шүүх, прокурорын байгууллага, удирдлага гаргасан эсвэл авлигатай тэмцэх байгууллага цагдаагийн байгууллагын шаардлагаар прокурорын зөвшөөрлөөр энэ мэдээллийг гаргаж болно гэсэн заалт нь байгаа. Хууль санаачлагчид энэ заалтаа буцаагаад татаж аваарай.

Түүний асуултад УИХ-ын гишүүн Н.Учрал хариуллаа.