Засгийн газраас байгуулсан, экспортыг эрчимжүүлж валютын нөөцийг нэмэгдүүлэх зорилготой ажлын хэсгийн II хуралдаан боллоо өчигдөр /2025.03.25/ боллоо. Дэлхийн зах зээл дээр нүүрсний үнэ буурч байгаа энэ үед экспортын хэмжээг нэмэгдүүлэх зайлшгүй шаардлага үүссэн тул тус ажлын хэсэг цаашдын арга хэмжээг хэлэлцэн, зарим шийдвэрүүдийг гаргасан байна.

Хурлын үеэр Ханги, Гашуунсухайт, Шивээхүрэн боомтуудад ажилласан ажлын хэсгийн тайлан, үүрэг даалгаврын биелэлт, болон томилолтын үеэр гарсан саналуудыг нэгтгэж, тэдгээрээс шийдвэрлэвэл зохих асуудлыг Засгийн газрын хуралдаанд оруулахаар тогтжээ.

Ажлын хэсгээс дараах чухал шийдвэрүүдийг гаргаж, хэрэгжилтэд хяналт тавин ажиллаж байна:

• Төмөр замын нүүрс тээврийн зардлыг бууруулж, өрсөлдөх чадварыг нэмэгдүүлсэн
• Биржийн журмыг өөрчилж, нүүрсний үнийг индексжүүлсэн нь үр дүнгээ өгч, одоогийн байдлаар 1 сая тонн нүүрсний захиалга ирээд байна
• Уул уурхай, биржийн тухай хуульд нэмэлт, өөрчлөлт оруулах төслийг боловсруулж, Засгийн газарт танилцуулахаар болсон
• Боомтын сэргэлтийн үндэсний хорооноос мэдээлснээр, эдгээр арга хэмжээ нь экспортын орлогыг нэмэгдүүлж, гадаад валютын нөөцийг өсгөхөд бодит хувь нэмэр үзүүлэх юм.

Ажлын хэсгийн ахлагч Сангийн сайд Б.Жавхлан "Ирэх долоо хоногт Шинэ журмын зохицуулалтаар Эрдэнэс таван толгой компани Ханги боомтоос Гашуун сухайтаар захиалга нь орж ирсэн 1 сая тн нүүрс гаргах арилжаа хийгдэнэ. Цаашид Биржийн үйл ажиллагаагаа дэмжих зорилгоор хатуу байсан хуулийн нөхцөлүүд дээр уян хатан байх зарчмын дагуу өөрчлөлт оруулах ажлын эцэслээд маргааш ЗГ-ын хуралдаанаар оруулна. Мөн төмөр замаар нүүрс тээвэрлэх өртгийг авто тээврийн үнээс бага болголоо" гэлээ.