2022.01.18

С.Чинзориг: Тухайн орны манай улстай харьцдаг арга барилыг судлах хэрэгтэй

УИХ-ын чуулганы /2022.01.18/-ны өдрийн хуралдаанаар Элчин сайд нарыг эгүүлэн татах, томилох асуудлаар зөвшилцөх Монгол Улсын Ерөнхийлөгчийн саналыг хэлэлцлээ.

Хэлэлцэж буй асуудалтай холбогдуулан УИХ-ын гишүүд асуулт асууж, санал хэллээ.

УИХ-ын гишүүн С.Чинзориг:

Элчин сайдад нэр дэвшигчдийг дэмжиж байна. Нэр дэвшигч П.Сэргэлэн нь хөдөө аж ахуйн салбарыг мэддэг, сайдын албан тушаал хашиж байсан туршлагатай нэгэн. Кувейт улстай дипломат харилцаа тогтоогоод 40 гаруй жил болж байна. Кувейтын сангаар дамжуулан тусламж үзүүлдэг, Эрдэнэт, Булганы зам, Тайширын усан цахилгаан станцыг барих зэрэг эдийн засгийн харилцаа байдаг. П.Сэргэлэн нэр дэвшигчийн очих гэж буй улс эдийн засгийн өндөр чадавхтай учир гадаадын хөрөнгө оруулалт татахад анхаарч ажиллаасай.

Швейцар улсад суух Элчин сайдад нэр дэвшсэн Д.Гэрэлмаад хэлэх зүйл байна. Олон улсын байгууллага төвлөрсөн улс учраас НҮБ-ийн төрөлжсөн байгууллагуудтай хамтын ажиллагаа үүсгэх боломжийг сайн судлаарай.

БНСУ-д хоёр онцлог байна. Монголчууд хамгийн ихээр ажиллаж амьдарч байгаа газар. Нөгөөтэйгүүр өмнө нь гацсан төсөл хөтөлбөрүүдийг түргэтгэхэд чухал ач холбогдол өгөх хэрэгтэй байна.

Улс орон болгоны манай оронтой харьцдаг арга барил өөр өөр байдаг. Үүнийг сайн судлаарай гэж хэлье.