МАХН-ын Ерөнхий нарийн бичгийн дарга Г.Шийлэгдамбатай цаг үеийн асуудлаар ярилцлаа. Тэрбээр, МАН-ын Их хуралд оролцож МАХН-аас явуулсан илгээлтийг уншиж сонсгосон билээ.

-МАХН-ын дарга Н.Энх­баярын биеийн байдал ямар байгаа вэ. Саяхан БНСУ-ын Буддын шашны тэр­гүүн хам­ба лам Чачинд бараалх­сан гэсэн мэдээлэл гарсан. Ер нь олон нийтийн зүгээс бие нь сайжирч, хэвийн бай­­далдаа орсон гэсэн ойл­гол­тыг төрүүлж байна?

-Н.Энхбаяр даргын биеийн байдал бага багаар дээр­дэж байна. Эмчилгээ оношил­гоо­ных нь байдал хэвээрээ үр­гэл­жилж байгаа. Зайлшгүй хийх шаард­лагатай мэс ажилба­руу­дыг тодорхой хугацааны өм­нө  хийсэн. Түүний дараах нөх­цөл байдал нь хэвийн бө­гөөд өдөр хоногоор дээрдэж бай­на.

Хэвлэл мэ­дээл­­лээр гараад байгаа шиг цоо эрүүл болчихсон зүйл байхгүй. Нөгөөтэйгүүр, ноцтой хүнд байдалд орсон зэргээр мэ­­дээлж байгаа. Энэ бүх зүйл худ­лаа. Мөн эмчилгээг то­дор­­хой хугацаанд хийлгэж бай­­гаа болохоор үр дүн гарч л таарна.

Тиймээс бусадтай хэ­вийн хэмжээнд ярилцах бүрэн бо­­лолцоотой болсон. Цаашдаа илүү удаан хугацаанд үе шаттай эмчилгээ  хийгдэнэ гэсэн. БНСУ-ын Буддын шашны тэр­гүүн хам­батай уулзсан явдал нь цэвэр өөрийнх нь харилцааны асуу­дал юм. Иймээс намын зүгээс бидний хувьд тодорхой мэ­дээлэл өгөх боломжгүй.

-Эмчилгээнийх зардлыг хаа­наас гаргаж байгаа вэ. Удаан хугацаанд өндөр өр­төг­тэй гадны улсад эмчилгээ хийл­гэж байгаа юм чинь то­дорхой хэмжээний сан­хүү­гийн бэрхшээл гарна байх?

-Ар гэр болон ойр дотны  хү­мүү­сийнх нь  дэмжлэг туслал­цаа­тайгаар эмчилгээ хийгдэж байгаа байх. Түүнээс намын зүгээс зохион байгуулалтай сан­хүүгийн дэмжлэг үзүүлсэн үйл ажиллагаа болоогүй.

Түүнч­лэн манай намын хувьд сан­хүүгийн тал дээр дэмжлэг өгөх боломж хомс юм. Ер нь намын гишүүд Н.Энхбаяр дар­гын биеийн байдалд маш их  санаа зовж байгаа.
Тиймээс на­мын гишүүд өөрсдийн зүгээс хө­рөнгө, мөнгө цуглуулах ажил зо­хион байгуулъя гэсэн үүднээс ханддаг. Өөрийнх нь барьж байгаа байр сууринаас бол ин­гэх шаардлагагүй гэдгийг ги­шүүддээ хэлсэн.

-Н.Энхбаяр даргыг хэлмэг­дүүлсэн. Тиймээс төрөөс эм­чилгээнийх нь зардлыг тө­рөөс гаргах шаардлагатай хэ­мээн МАХН-ын гишүүд үзэж байгаа гэсэн. Энэ асууд­лаар танд хандсан уу?

-Албан ёсоор манай намд ийм асуудал яригдаагүй. Ард иргэд болон жирийн дэмжигч гишүүдийн зүгээс  энэ асуудлыг бидэнд тавьдаг. Өөрөөр хэл­бэл, Н.Энхбаяр даргыг төр хэл­мэгдүүлсэн. Тиймээс төр өөрөө эм­чилгээнийх нь зардлыг гар­гах ёстой гэсэн асуудлыг тавь­даг.

-Та бүхний зүгээс МАН-ын Их хуралд нэлээд анхаарал хандуулж байна. Ер нь ямар үр дүн хүлээж байна вэ. Өөрөөр хэлбэл, угшил нэг бо­ловч улс төрийн тавцанд яах аргагүй өрсөлдөгч шүү дээ?

Их хурлын үеэр

-МАН Их хурлаараа нэн тэр­гүүнд намын дотоод асуудлаа авч хэлэлцэх байх. Түүнчлэн УИХ-д суудалтай, цөөнхийг бүр­дүүлж байгаа улс төрийн хүч­ний хувьд Монгол Улсын цааш­дын хөгжлийн чиг хандлага бод­логын талаар авч хэлэлцэнэ байх гэж харж байгаа. Тиймээс МАН-ын Их хурлаас гарах үр дүнд анхаарал хандуулж байна. Дар­га, цэргээ өөрчлөх асуудлыг намынхаа гол ажил болгоогүй байх.

-Сүүлийн үед МАН, МАХН-ын нэгдэн нийлэх асуудал их яригдаж байна. Илгээлт ч иймэрхүү утга агуулчихав уу гэж харагдаад?

-Хоёр намын цаашдын чиг ханд­лагын талаар бол байнга л яригддаг асуудал. МАХН-ын зүгээс шударга ёсыг тог­тоохын төлөө, улс орноо хөг­жүүлэхийн төлөө аль ч улс тө­рийн хүчинтэй эвсэхэд бэлэн, нээлт­тэй байдаг.

Үүний нэг то­дорхой жишээ нь “Шударга ёс эвсэл” байна. Тиймээс өнөөд­­рийн парламентад ма­най­хан гуравдагч хүчний үүрэг гүй­цэтгээд явж байна.

МАХН, МАН-ын гишүүдийн  хувьд нэг­дэн нийлэх асуудал тодор­хой байр суурийг эзэлдэг. Бид нэгдэж, нийлэх гэхээс илүү­­тэй зөв бодлого дээр хам­тарч ажиллах асуудлыг нэн тэр­гүүний зорилтоо болгож ажил­лана.

Тиймээс МАН-ын Их хурлаас гарах шийдвэр болон шинэ удирдлагуудтай нэгдэж нийлэх гэдгээс илүү хамтын ажил­лагаандаа ач холбогдол өгнө.

-МАН-ын зарим гишүүд Н.Энх­баяраас албан ёсны уучлал хүсэх ёстой. Тэгж байж намын нэгдэн нийлэх асууд­лыг ярилцах нь зүйтэй гэсэн байр суурьтай байдаг гэсэн?

-МАН-д Н.Энхбаяр даргатай олон жил хамтарч ажиллаж, нэг намын үзэл баримтлалын дор явж байсан хүмүүс байгаа. Тэд дундаас хүн ёсныхоо хувьд ууч­лал гуйх олон хүн бий гэж боддог. Уучлал гуйх асуудал бол тухайн хүмүүсийн гаргах шийдвэр юм.

-Намын Бага, Их чуулганаа хэзээ зохион байгуулах вэ?

-Намын Бага, Их чуулганаа ойрын үед хуралдуулахаар тө­лөв­лөж байгаа. Тодруулбал, энэ ондоо багтаан  Бага чуул­ганаа хуралдуулна. Харин дөн­гөж он гараад Их чуулганаа хуралдуулах төлөвлөгөөтэй бай­гаа.

Хуралдаануудаар на­мын дотоод асуудал болоод, өнгөр­сөн сонгуулийн үед гарсан олон, амжилт, алдаа, оноогоо дүгнэж хэлэлцэнэ. Цаашид улс төрийн намынхаа хувьд улам бэхжих зо­рилтуудыг тавьж ажиллана.

-МАХН-ын Ерөнхий на­рийн бичгийн дарга болон дэд даргаа өөрчилнө гэсэн асуу­дал яриад байгаа гэсэн мэ­дээлэл байна. Энэ үнэн үү?

-Хэн нэгэн даргыг өөрчлөх гэхээсээ илүүтэй үйл ажил­ла­гааны чиглэлдээ үнэлэлт дүг­­нэлт өгөх нь чухал. Шаард­ла­гатай тохиолдолд намын удирдлагуудыг өөрчлөх асуудал нь нээлттэй. Энэ бол аль ч улс төрийн хүчинд тавигддаг асуу­дал шүү дээ. Асуудлыг олонхоороо шийднэ.